.
Agent Kim Reactivated கொரியன் நாடகம் எபிசொட் 2 ஒரு பார்வை
‘ஏஜென்ட் கிம் ரியாக்டிவேட்டட்’ – அத்தியாயம் 2 சுருக்கம்
Agent Kim Reactivated தொடரின் இரண்டாவது எபிசோட், நம்மை நேராக 2008-ஆம் ஆண்டிற்கு அழைத்துச் செல்கிறது. காங்வான் மாகாணத்தில் உள்ள Cheonsan Unit-ல் பணியாற்றிக் கொண்டிருந்த ஏஜென்ட் கிம், தனது மேலதிகாரியிடமிருந்து மிகவும் ஆபத்தான ஒரு ரகசிய பணியைப் பெறுகிறார்.
அந்தப் பணி என்னவென்றால், தென் கொரியாவின் General Bureau of Intelligence அமைப்பில் இருந்த கடுமையான அதிகாரியான துணை இயக்குநர் கிம் ஜியோங்-சியோனை கொலை செய்வது. இரு கொரியாக்களுக்கிடையேயான அமைதிப் பேச்சுவார்த்தையைத் தடுக்க, பல ரகசிய உளவாளிகளின் மரணத்திற்குப் பின்னால் இருந்தவன் அவன்தான். ஆனால் இந்தக் கொலைக்குப் பிறகு, உண்மையை மறைத்து, “வட கொரிய வீரர் ஒருவரால் அவர் கொல்லப்பட்டார்” என்ற பொய்யான தகவலே ஊடகங்களில் வெளியிடப்படுகிறது.
ஒரு தந்தையாக மறுபிறவி எடுத்த ஏஜென்ட் கிம்
இந்த ஆபத்தான பணியை வெற்றிகரமாக முடித்த ஏஜென்ட் கிம், அடுத்த நொடியே மருத்துவமனைக்கு விரைந்து செல்கிறார். காரணம், அவரது மனைவிக்கு குழந்தை பிறக்கவிருந்தது. ஆனால் மகிழ்ச்சியுடன் காத்திருந்த அந்த தருணம், அவருடைய வாழ்க்கையின் மிகப்பெரிய சோகமாக மாறுகிறது.
ஒரு அழகான பெண் குழந்தை பிறக்கிறது. அந்தக் குழந்தைக்குப் மின்-ஜி என்று பெயர் வைக்கப்படுகிறது. ஆனால் குழந்தையைப் பெற்றெடுத்த சில நிமிடங்களிலேயே அவரது மனைவி உயிரிழக்கிறார். உயிர் பிரியும் முன், ஏஜென்ட் கிம்மின் கையைப் பிடித்து, “உன் பழைய வாழ்க்கையையும், அந்த இருண்ட கடந்த காலத்தையும் மறந்துவிடு. இனிமேல் என் மகளுக்காக ஒரு நல்ல அப்பாவாக மட்டும் வாழ வேண்டும்” என்று இறுதி ஆசையைச் சொல்லிவிட்டு கண்களை மூடுகிறார்.
இந்த ஒரு வாக்கியம், ஏஜென்ட் கிம்மின் வாழ்க்கையை முழுவதுமாக மாற்றுகிறது.
கதை மீண்டும் நிகழ்காலத்திற்குத் திரும்புகிறது. தனது மேலதிகாரியை துப்பாக்கி முனையில் நிறுத்திய ஏஜென்ட் கிம், “இப்போதே என்னை இந்தப் பணியிலிருந்து விடுவிக்க வேண்டும்” என்று உறுதியாகக் கோருகிறார். அவரது முடிவின் பின்னால் இருந்த வலியையும் காரணத்தையும் புரிந்துகொண்ட மேலதிகாரி, இறுதியில் அவரது ராஜினாமாவை ஏற்றுக்கொள்கிறார்.
அந்த நாளுக்குப் பிறகு, உலகம் முழுவதும் பயத்தை ஏற்படுத்திய ரகசிய ஏஜென்ட் மறைந்து விடுகிறார். அவரது இடத்தில், தனது மகளே தனது உலகம் என்று வாழும் ஒரு சாதாரண தந்தை மிஸ்டர் கிம் பிறக்கிறார்.
மகளின் சிரிப்பிலேயே மகிழ்ச்சியைத் தேடும் அன்பான அப்பாவாகவும், தனது கடந்த காலத்தை முழுவதுமாக புதைத்துவிட்டு புதிய வாழ்க்கையைத் தொடங்கிய மனிதராகவும் அவர் மாறுகிறார். ஆனால் அவர் மறைத்து வைத்திருக்கும் அந்த ரகசியமான கடந்த காலம், மீண்டும் அவரது வாழ்க்கையைத் தேடி வரப்போகிறது என்பதை இந்த எபிசோட் நமக்குச் சுட்டிக்காட்டுகிறது.
மகள் மின்-ஜியைத் தேட ஆரம்பிக்கும் தந்தையின் கோபம்
எபிசோட் 2-ல் அடுத்தடுத்து வரும் ஃபிளாஷ்பேக் காட்சிகள், மின்-ஜி எப்படி அந்த கொடூரமான வலையில் சிக்கினாள் என்பதை மெதுவாக வெளிச்சத்துக்குக் கொண்டு வருகின்றன.
நாம்-ஹூன் அனுப்பியதாக மின்-ஜிக்கு வந்த குறுஞ்செய்தி உண்மையில் அவனால் அனுப்பப்பட்டதே இல்லை. சில ரவுடிகள் நாம்-ஹூனை மடக்கிப் பிடித்து, அவனது மொபைல் போனை பறித்துக் கொண்டு, அந்தச் செய்தியை மின்-ஜிக்கு அனுப்பியிருந்தனர். நண்பன் அழைக்கிறான் என்று நம்பிய மின்-ஜி, எதையும் சந்தேகிக்காமல் அந்த இடத்திற்குச் செல்கிறாள்.
ஆனால் அங்கு காத்திருந்தது நண்பன் அல்ல… ஹ்யே-ரியும், அவளது தோழிகளும், சில ரவுடிகளும்தான்.
மின்-ஜியைச் சுற்றி வளைத்த அவர்கள், மாறி மாறி அவளை தாக்கத் தொடங்குகிறார்கள். தனியாக இருந்தாலும், மின்-ஜி தன்னால் முடிந்தவரை தைரியமாக எதிர்த்து சண்டையிடுகிறாள். ஆனால் இறுதியில் ஹ்யே-ரி கொடுத்த பலமான அடியால் மின்-ஜி மயங்கி கீழே விழுகிறாள்.
அதே நேரத்தில், எதுவும் தெரியாமல் மிஸ்டர் கிம் வீட்டிற்கு வந்து, தனது மகள் மின்-ஜியின் பிறந்தநாளைக் கொண்டாடத் தயாராகிக் கொண்டிருக்கிறார். மகளுக்கு பிடித்த உணவுகளைச் செய்து, அவளுக்காக அன்புடன் காத்திருக்கும் அந்தத் தந்தையின் மனநிலையைப் பார்க்கும்போது, அடுத்து நடக்கப்போகும் சம்பவம் இன்னும் பதற்றத்தை ஏற்படுத்துகிறது.
இதற்கிடையில், சம்பவத்தில் இருந்த ரவுடிகளில் ஒருவன், “யாரும் இதைப் பற்றி வெளியே சொல்லக்கூடாது” என்று அனைவரையும் மிரட்டிவிட்டு, அவர்களது செல்போன்களையும் பறித்துக் கொள்கிறான்.
பிறகு அவன், கோல்டன் டீத் கும்பலின் தலைவன் ஓ மின்-சியோலை தொடர்புகொண்டு, “மின்-ஜியை எப்படி அகற்றுவது?” என்று உதவி கேட்கிறான்.
அந்த நேரத்தில், மிஸ்டர் ஜூவின் அலுவலகத்தில் ஏற்கனவே பார்த்த மர்ம மனிதனும் அங்கே இருந்தான். அவர்கள் பேசியதை முழுவதுமாகக் கேட்ட அவன், இந்த வேலைக்கு உதவுவதாக முன்வருகிறான்.
மயக்க நிலையில் இருந்த மின்-ஜியை தனது காரின் டிக்கியில் அடைத்து வைக்கிறான். அதோடு, ஹ்யே-ரி தனக்கு பணம் கொடுத்து இந்த விஷயத்தை மறைக்கச் சொல்வதை ரகசியமாக வீடியோவாக பதிவு செய்துவிடுகிறான். வீட்டிற்குச் செல்லும் வழியில், “இந்த உடலை எப்படி யாருக்கும் தெரியாமல் அகற்றப் போகிறேன்” என்று ஹ்யே-ரியிடம் கூறுகிறான். மேலும், “இந்த விஷயம் உன் அப்பாவுக்குக் கூட தெரியக்கூடாது” என்று எச்சரிக்கிறான்.
இதற்குப் பிறகு, முதல் எபிசோட்டின் இறுதிக் காட்சிக்கே கதை மீண்டும் திரும்புகிறது. மின்-ஜி எங்கே இருக்கிறாள் என்று மிஸ்டர் கிம் கேட்டபோது, அந்த ரவுடி ஒன்றும் தெரியாதது போல பொய் சொன்னது இப்போது ஏன் என்பது பார்வையாளர்களுக்குப் புரிகிறது.
மகளைக் கண்டுபிடிக்க முடியாமல் வீடு திரும்பும் மிஸ்டர் கிம், மனவேதனையில் உடைந்து போகிறார். ஒரு கணம் மின்-ஜி வீட்டில் இருப்பது போல அவருக்குத் தோன்றுகிறது. ஆனால் அது வெறும் மாயை என்பதை உணரும்போது, ஒரு தந்தையின் இதயம் சிதறிப் போகிறது.
அடுத்த நாள் அவர் வேலைக்குச் செல்லவே தாமதமாகிறது. அலுவலகத்தில் சக ஊழியரான சாங்-ஆ பலமுறை தொடர்புகொள்ள முயற்சித்தும், அவரைச் சேர முடியவில்லை.
இறுதியாக, மகளைக் கண்டுபிடிக்க ஒரே வழி எதிரிகளை நேரடியாகச் சந்திப்பதுதான் என்று முடிவு செய்கிறார் மிஸ்டர் கிம். ஓ மின்-சியோலையும், இந்தக் கடத்தலுக்குப் பின்னால் இருப்பவர்களையும் தேடி வேட்டையை ஆரம்பிக்கிறார்.
அடுத்த காட்சியில், ஓ மின்-சியோலும் அவரது கந்து வட்டிக் கும்பலும், கடனைத் திருப்பிச் செலுத்த முடியாத ஒருவரை மிரட்டிக் கொண்டிருக்கிறார்கள். அவர்கள் எழுதிய ஒப்பந்தத்தில், “குறிப்பிட்ட தேதிக்குள் பணத்தைச் செலுத்தவில்லை என்றால், அவரது குடும்ப உறுப்பினர்களின் உடல் உறுப்புகளை எடுத்துக்கொள்ளலாம்” என்ற மனிதாபிமானமற்ற விதி இடம்பெற்றிருப்பது அதிர்ச்சியை ஏற்படுத்துகிறது.
கடனைத் திருப்பிச் செலுத்த முடியாததால், அந்த மனிதரின் இளம் மகளை உறுப்பு கடத்தலுக்காக அழைத்துச் செல்ல முயற்சிக்கிறார்கள்.
அந்த நேரத்தில் வீட்டின் கதவு மணி ஒலிக்கிறது.
கதவைத் திறந்ததும், அங்கே நின்றிருப்பது மிஸ்டர் கிம்.
“ஓ மின்-சியோல் எங்கே?” என்று அமைதியாகக் கேட்கும் அவர், அடுத்த நொடியில் மின்னல் வேகத்தில் தாக்குதலைத் தொடங்குகிறார். கும்பலில் இருந்த அனைவரையும் தனியாக எதிர்கொண்டு சண்டையிட்டு, அந்தச் சிறுமியை சரியான நேரத்தில் காப்பாற்றுகிறார்.
ஓ மின்-சியோல் அங்கிருந்து தப்பித்தாலும், மிஸ்டர் கிம் பயன்படுத்திய மெல்லிய எஃகு கம்பி போன்ற ஆயுதத்தால் கடுமையாகக் காயமடைகிறார்.
மறுபுறம், முந்தைய இரவு உணவகத்தில் நடந்த மோதலுக்காக டேக்வாண்டோ பயிற்சியாளர் ஹான்-சு காவலில் அடைக்கப்பட்டிருக்கிறார். தன்னை உடனே விடுவிக்க வேண்டும் என்று போலீசாரிடம் வாதிடுவதோடு, ஜின்-சியோலையும் தனக்காக சாட்சி சொல்லும்படி வலியுறுத்துகிறார்.
இந்நேரம், மிஸ்டர் கிம் வசிக்கும் வீட்டின் கீழே இருக்கும் சலவை நிலைய உரிமையாளர், மிஸ்டர் கிம் கும்பலைத் தனியாகச் சாய்த்த சண்டைக் காட்சிகள் சமூக வலைதளங்களில் வைரலாகி இருப்பதைக் கண்டு அதிர்ச்சியடைகிறார்.
ஒரு சாதாரண தந்தை என்று அனைவரும் நினைத்த மனிதர், உண்மையில் யார் என்பதை உலகம் மெதுவாக அறியத் தொடங்குகிறது. மின்-ஜியைக் காப்பாற்றும் இந்தப் போராட்டம் இனி இன்னும் ஆபத்தான கட்டத்தை நோக்கி நகர்கிறது.
ஏஜென்ட் கிம் மீண்டும் களமிறங்கியதை அறியும் எதிரிகள்
மின்-ஜியைக் காப்பாற்றும் முயற்சியில் மிஸ்டர் கிம் நடத்திய அதிரடி சண்டை சமூக வலைதளங்களில் வைரலாகப் பரவுகிறது. அந்த ஒரு வீடியோ, பல ஆண்டுகளாக மறைந்து வாழ்ந்த ரகசிய ஏஜென்டின் அடையாளத்தை மீண்டும் வெளிச்சத்திற்குக் கொண்டு வருகிறது.
கதை இப்போது வட கொரியாவின் General Bureau of Intelligence அமைப்பின் Media Surveillance Room-க்கு நகர்கிறது. சமூக வலைதளங்களில் பரவி வரும் வீடியோக்களை கண்காணித்துக் கொண்டிருந்த அதிகாரிகள், அதில் சண்டையிடும் மனிதரைப் பார்த்ததும் அதிர்ச்சியடைகிறார்கள்.
“இவர் சாதாரண மனிதர் இல்லை… இவர் தான் நம்பர் 66… ஏஜென்ட் கிம்!” என்று உறுதிப்படுத்துகிறார்கள். உடனே அவரை Tier One Threat எனப்படும் மிக உயர்ந்த அபாய பட்டியலில் சேர்க்கிறார்கள்.
அங்கிருந்த உயர் அதிகாரிகள், ஏஜென்ட் கிம்மை மீண்டும் பிடித்து வருவது குறித்து ஆலோசிக்கிறார்கள். ஆனால் இன்னும் ஒரு மாதத்தில் நடைபெறவிருக்கும் தென்-வட கொரியா அமைதிப் பேச்சுவார்த்தை முடியும் வரை எந்த நடவடிக்கையும் எடுக்காமல் காத்திருக்க முடிவு செய்கிறார்கள்.
இந்த முடிவு அனைவருக்கும் பிடிக்கவில்லை. குறிப்பாக Comrade Director General, ஏஜென்ட் கிம் சுதந்திரமாக இருப்பதே மிகப்பெரிய ஆபத்து என்று கோபமாகக் கூறுகிறார்.
கூட்டம் முடிந்த பிறகு தனது கோபத்தை வெளிப்படுத்தும் அவர், “நம்பர் 66-ஐ பிடிக்க ஒரே ஒருவரால் மட்டுமே முடியும். அவர் பார்க் யியோங்-க்வாங்!” என்று கூறுகிறார்.
பார்க் யியோங்-க்வாங் ஒரே ஆளாக ஒரு முழு ராணுவப் படைப்பிரிவையே அழித்துவிடும் அளவுக்கு திறமையான வீரர். ஆனால் அவர் ஏற்கனவே இறந்துவிட்டார். இருப்பினும், அவரது தம்பி தற்போது ராணுவத்தில் பணியாற்றி வருகிறார். அண்ணனைப் போலவே அபாரமான திறமையைக் கொண்டிருப்பதால், எதிர்காலத்தில் அவரே ஏஜென்ட் கிம்மின் புதிய எதிரியாக மாறக்கூடும் என்பதற்கான சுட்டிக்காட்டை இந்தக் காட்சி அளிக்கிறது.
அதே நேரத்தில் தென் கொரியாவிலும் பரபரப்பு நிலவுகிறது.
Special Missions Directorate (SMD) அதிகாரிகளும் மிஸ்டர் கிம் மீண்டும் செயல்படத் தொடங்கியிருப்பதை உணர்கிறார்கள். அதிகாரி ஒருவர், மிஸ்டர் கிம்முடன் தொடர்புடைய பார்க் ஜின்-சியோல் பற்றிய தகவல்களையும், உணவகத்தில் நடந்த சண்டை சம்பவத்தையும் விரிவாக அறிக்கை செய்கிறார்.
இந்த அறிக்கையைப் பெறுபவர், Special Missions Directorate-இன் இயக்குநர் காங் குக்-சியோல். இவரது ரகசிய பெயர் “Mole Cricket”. மேலும், ஏஜென்ட் கிம் மீண்டும் களமிறங்கிய பிறகு வட கொரியாவின் நடவடிக்கைகளும் அதிகரித்திருப்பதாகவும் அந்த அதிகாரி தெரிவிக்கிறார்.
இதற்கிடையில், மிஸ்டர் கிம் தனது விசாரணையை மிகவும் ஆபத்தான கட்டத்திற்கு எடுத்துச் செல்கிறார்.
ஓ மின்-சியோலைப் பிடித்து கடுமையாக விசாரிக்கிறார். ஆரம்பத்தில் உண்மையை மறைக்க முயன்ற மின்-சியோல், இறுதியில் பல முக்கியமான தகவல்களை வெளியிடுகிறான்.
அவன் சொல்வதன்படி, இந்தக் கடத்தல் மற்றும் குற்றச் செயல்களில் ஈடுபடும் கீழ்மட்ட கும்பல் உறுப்பினர்கள் அனைவருக்கும் Telegram-ல் தற்காலிக குழு உருவாக்கப்படுகிறது. அதில் உத்தரவுகள் அனுப்பப்படும். வேலை முடிந்தவுடன் அந்தக் குழுவும், அதில் இருந்த அனைத்து செய்திகளும் உடனடியாக அழிக்கப்பட்டுவிடும். இதனால் எந்த ஆதாரமும் போலீசாரிடம் சிக்காது.
மேலும், “நான் இன்னும் சிறுவன். சட்டம் என்னை பெரியதாக தண்டிக்காது” என்று அகம்பாவத்துடன் பேசுகிறான் மின்-சியோல்.
அதை கேட்ட மிஸ்டர் கிம் அமைதியாக அவன் மீது துப்பாக்கியை நீட்டுகிறார்.
உயிர் பயத்தில் நடுங்கிய மின்-சியோல், “இல்லை… நான் மட்டும் 20
வயதுக்கு மேல். என்னோட கூட்டத்தில்தான் மற்றவர்கள் எல்லாம் சிறுவர்கள்!” என்று உண்மையை உளறிவிடுகிறான்.
அந்த நேரத்தில் அவனது செல்போனுக்கு ஒரு புதிய குறுஞ்செய்தி வருகிறது.
“உன் குழுவில் யாரும் வாயைத் திறக்கக்கூடாது. எல்லாரையும் அமைதியாக வைத்துக்கொள்” என்ற உத்தரவு அதில் இருந்தது.
உடனே அந்த எண்ணுக்கு மிஸ்டர் கிம் அழைக்கிறார். ஆனால் மறுமுனையில் யாரும் பதிலளிக்கவில்லை.
மின்-ஜியை காரில் கடத்திச் சென்ற கோல்டன் டீத் என்ற குற்றவாளி, மறுபுறம் மற்றவர்களிடம், “Telegram குழுவை உடனே அழித்துவிடுங்கள். போனையும் தூக்கி எறியுங்கள். போலீசார் அந்த எண்ணைத் தொடர்புகொள்ளலாம்” என்று எச்சரிக்கிறான்.
அதன் பிறகு வந்த கடைசி செய்தி, மிஸ்டர் கிம்மின் உலகையே தலைகீழாக மாற்றுகிறது.
“அந்தப் பெண்ணின் உடலை நாங்கள் பார்த்துக் கொண்டோம்.”
இந்த ஒரு வரியைப் பார்த்ததும், தனது மகள் மின்-ஜி உயிரிழந்துவிட்டாள் என்று மிஸ்டர் கிம் நம்பிவிடுகிறார்.
அவரது கண்களில் கண்ணீரும், மனதில் அளவற்ற கோபமும் வெடிக்கிறது.
ஆத்திரத்தில் மின்-சியோலை சுட்டுக் கொல்ல அவர் முயற்சிக்கும் அந்த நொடியில், போலீசார் அங்கு வந்து விடுகிறார்கள். அதனால் மின்-சியோல் உயிர் தப்புகிறான்.
மறுபுறம், ஹ்யே-ரி நடந்த சம்பவத்தால் உள்ளுக்குள் பதட்டமாக இருக்கிறாள். அவளது தந்தை மிஸ்டர் ஜூ, எதுவும் தெரியாதது போல மகளிடம் அன்றைய நாள் எப்படி சென்றது என்று சாதாரணமாகக் கேட்கிறார்.
அதோடு, “மின்-ஜியைப் பற்றிய விஷயத்தை மறந்துவிடு. உன்னைப் பார்த்தாலே மற்றவர்கள் நடுங்க வேண்டும். யாரும் உன்னை பலவீனமானவள் என்று நினைக்கக் கூடாது” என்று அறிவுரை கூறுகிறார்.
அந்த வார்த்தைகள், ஹ்யே-ரியின் கொடூரமான நடத்தைக்கு பின்னால் அவளது தந்தையின் வளர்ப்பும், அதிகார வெறியும் முக்கிய காரணமாக இருப்பதை வெளிப்படுத்துகின்றன.
இந்த எபிசோட்டின் இந்தப் பகுதி, மின்-ஜியின் நிலை என்ன என்ற பதற்றத்தையும், ஏஜென்ட் கிம் மீண்டும் உலகின் கவனத்திற்கு வந்துவிட்டார் என்பதையும் வலுவாக உணர்த்துகிறது. இனி அவர் ஒரு மகளைத் தேடும் தந்தை மட்டுமல்ல… வட கொரியாவும், தென் கொரியாவின் ரகசிய அமைப்புகளும் கண்காணிக்கும் மிக ஆபத்தான மனிதராக மீண்டும் மாறியிருக்கிறார்.
மகள் உயிருடன் இருக்கலாம் என்று தந்தை உணர்தல்
எபிசோட் 2-ன் இறுதிக்கட்டம், அடுத்த எபிசோட்டிற்கான மிகப்பெரிய எதிர்பார்ப்பை ஏற்படுத்தும் வகையில் பரபரப்பாக நகர்கிறது.
கோல்டன் டீத்தின் கூட்டாளிகள், “ஹ்யே-ரியிடம் இருந்து ஏன் பணம் வாங்கவில்லை?” என்று அவனிடம் கேட்கிறார்கள். அதற்கு அவன், “யோசிக்காமல் பணத்துக்காக பேராசைப்பட்டால், மிஸ்டர் ஜூ நம்மை உயிருடன் விடமாட்டார்” என்று பதிலளிக்கிறான்.
இந்த உரையாடலோடு, கதை 2016-ஆம் ஆண்டிற்கு ஒரு ஃபிளாஷ்பேக்காக மாறுகிறது.
அப்போது மிஸ்டர் ஜூ யார் என்பதை இந்தத் தொடர் வெளிப்படுத்துகிறது. ஆரம்பத்தில் ஒரு சாதாரண ரவுடியாக இருந்த அவர், மிரட்டல், வன்முறை மற்றும் சட்டவிரோத வழிகளில் கட்டுமான நிறுவனங்களை அபகரித்து மிகப்பெரிய செல்வாக்கு மிக்க மனிதராக உயர்ந்திருந்தார்.
கருணை என்ற வார்த்தையே தெரியாத அளவுக்கு கொடூரமான மனிதராக மிஸ்டர் ஜூ சித்தரிக்கப்படுகிறார். “இன்று நான் உயிருடன் இருப்பதற்கே அவர்தான் காரணம். அவருக்கு நான் கடன்பட்டவன்” என்று கோல்டன் டீத் கூறுவதன் மூலம், அவர்களுக்குள் இருக்கும் பழைய தொடர்பும் மரியாதையும் வெளிப்படுகிறது.
இதற்கிடையில், மிஸ்டர் கிம்மை போலீசார் காவல் வாகனத்தில் காவல் நிலையத்திற்கு அழைத்துச் செல்கிறார்கள்.
அதே நேரத்தில், வட கொரியாவிலிருந்து இன்னொரு ரகசிய உளவாளி கடல் வழியாக தென் கொரியாவுக்குள் நுழைகிறார்.
அவர் வேறு யாருமல்ல… ஒருகாலத்தில் ஏஜென்ட் கிம் (நம்பர் 66) கையால் தோற்கடிக்கப்பட்ட புகழ்பெற்ற வீரர் பார்க் யியோங்-க்வாங் என்பவரின் தம்பி.
அவருக்கும் தற்போது “நம்பர் 66” என்ற குறியீட்டு பெயர் வழங்கப்பட்டுள்ளது. அவரது ஒரே பணி – முன்னாள் ஏஜென்ட் கிம்மை கண்டுபிடித்து கொலை செய்வது.
தென் கொரியாவில் அவருக்காக காத்திருந்த தொடர்பு அதிகாரி, மிஸ்டர் கிம் தற்போது இருக்கும் இடமான காவல் நிலையம் பற்றிய தகவலையும், ஒரு கார் மற்றும் துப்பாக்கியையும் வழங்குகிறார். மேலும், வட கொரியாவின் ரகசிய முகவர்களுக்குத் தேவையான நிதியுதவியையும் கேட்டுப் பெறுமாறு கூறுகிறார்.
மறுபுறம், முந்தைய சண்டை சம்பவத்திற்காக கைது செய்யப்பட்டிருந்த ஹான்-சு ஜாமீனில் வெளியே வருகிறார்.
ஜின்-சியோல் எப்போதும் அலட்சியமாக நடந்து கொள்வதைப் பற்றி புலம்பிக்கொண்டிருக்கும் அவர், வழியில் புதிய நம்பர் 66-ஐ பார்க்கிறார். ஒரு நொடி சந்தேகம் வந்தாலும், அதை பெரிதாக எடுத்துக் கொள்ளாமல் அங்கிருந்து சென்றுவிடுகிறார்.
புதிய நம்பர் 66 தனது அடுத்த திட்டத்தைத் தொடங்குகிறார்.
போலீஸ் சீருடை அணிந்து காவல் நிலையத்திற்குள் நுழைந்த அவர், அங்கு உணவு கேட்டுக் கொண்டிருந்த ஜின்-சியோலைச் சந்திக்கிறார்.
மிஸ்டர் கிம் எங்கே இருக்கிறார் என்று அவர் அமைதியாகக் கேட்கிறார். ஆனால் ஜின்-சியோல் நேரடியாக பதில் சொல்ல மறுக்கிறார்.
அடுத்த நொடியில் துப்பாக்கியை எடுத்துக் காட்டியதும், உயிர் பயத்தில் ஜின்-சியோல் மிஸ்டர் கிம் வசிக்கும் வீட்டின் முகவரியைச் சொல்லிவிடுகிறார்.
அதற்குப் பிறகு, தன்னுடன் இருந்த கைதியின் கழுத்தை நெரித்து சண்டையை உருவாக்கி, அந்த குழப்பத்தைப் பயன்படுத்தி காவல் நிலையத்திலிருந்து தப்பித்துவிடுகிறார்.
இதற்கிடையில், கோல்டன் டீத் ஹ்யே-ரியுடன் பேசிய ரகசிய ஒலிப்பதிவைக் கேட்டு கொண்டிருக்கிறார். அதே நேரத்தில், அவரது ஆட்கள் நிலத்தை அபகரிப்பதற்காக ஒரு நபரை கொடூரமாகத் தாக்கிக் கொண்டிருக்கிறார்கள்.
அந்த ஒலிப்பதிவை திருத்தி பாதுகாப்பாக வைத்துவிட்டு, கோல்டன் டீத் தனது காரின் டிக்கியைத் திறக்கிறார்.
“மின்-ஜியின் உடலை ஒழுங்காக மூடக்கூட தெரியாதா?” என்று தனது ஆளிடம் கோபமாகக் கத்துகிறார்.
ஆனால் அடுத்த நொடியே மிகப்பெரிய திருப்பம் காத்திருக்கிறது.
அனைவரும் இறந்துவிட்டாள் என்று நினைத்த மின்-ஜி… இன்னும் உயிருடன் இருக்கிறாள்!
அவள் மிகவும் மோசமான நிலையில் இருந்தாலும், உயிர் மட்டும் பிரியாமல் போராடிக் கொண்டிருக்கிறாள்.
மறுபுறம், காவல் நிலையத்தில் மிஸ்டர் கிம் தொடர்ந்து விசாரணைக்கு உட்படுத்தப்படுகிறார்.
போலீசார் எவ்வளவு கேட்டாலும், அவர் ஒரு வார்த்தைகூட பேச மறுக்கிறார்.
அவரது கைரேகைகளை பதிவு செய்து அடையாளத்தை சரிபார்க்க முயற்சிக்கிறார்கள். ஆனால் அவரது தகவல்களை அணுக முயன்றபோது, கணினி அணுகலை மறுக்கிறது. அவரது கடந்தகாலம் எவ்வளவு ரகசியமானது என்பதை இது மீண்டும் நிரூபிக்கிறது.
அதே நேரத்தில், திடீரென மிஸ்டர் கிம்மின் செல்போன் ஒலிக்கிறது.
திரையில் தெரியும் பெயர்…
“மின்-ஜி.”
அதிர்ச்சியடைந்த மிஸ்டர் கிம் உடனே அழைப்பை ஏற்கிறார்.
மறுமுனையில் உண்மையாகவே மின்-ஜிதானா? அவள் எப்படி உயிருடன் இருக்கிறாள்? அவள் இப்போது எங்கே?
இந்தக் கேள்விகளுக்கெல்லாம் பதில் சொல்லாமல், மிகப்பெரிய சஸ்பென்ஸில் எபிசோட் 2 முடிவடைகிறது.
ஒரு தந்தையின் நம்பிக்கை மீண்டும் உயிர் பெறும் அந்த ஒரு தொலைபேசி அழைப்பு, அடுத்த எபிசோட்டை பார்க்காமல் இருக்க முடியாத அளவுக்கு பார்வையாளர்களின் எதிர்பார்ப்பை பல மடங்கு உயர்த்துகிறது.
.
Tags,
Agent Kim Reactivated in tamil, Agent Kim Reactivated Episode 2 in tamil, Agent Kim Reactivated Episode 2 Review in tamil, Agent Kim Reactivated Episode 2 Recap, Agent Kim Reactivated Tamil, Agent Kim Reactivated Tamil Review, Agent Kim Reactivated Explained in tamil, Agent Kim Reactivated Story, KDrama Tamil, Korean Drama Tamil, Korean Drama Review, KDrama Recap, KDrama Explained, Korean Series Review, Korean Thriller Drama, Korean Action Drama in tamil, Spy Thriller KDrama, Drama Lookup, Drama Lookup Tamil, Drama Lookup KDrama, Episode 2 Review, Episode 2 Explained, KDrama Story Explained, Korean Entertainment, Latest KDrama 2026, Must Watch KDrama, South Korean Drama, Korean Drama Blog, Tamil Entertainment, KDrama Blog, KDrama Fans, KDrama Updates,
.